Mwongozo Wa Kufahamu Muda Na Gharama Za Ukarabati Wa Nyumba Za Kuuza Ndani Ya Miaka Miwili (2)
Kuuza nyumba ndani ya miaka miwili (2) tangu kukamilisha malipo ni moja ya njia za kutengeneza fedha kwenye uwekezaji wa ardhi na nyumba.
Kununua na kuuza nyumba (flipping houses) ni mbinu ya kuwekeza kwenye majengo inayohusisha kutafuta, kununua, kukarabati na kuuza majengo ndani ya miaka miwili (2).
Njia hii ya kutengeneza fedha inahitaji mwekezaji utimize mambo yafuatayo;-
✓ Uwe na timu bora ya kununua na kuuza viwanja hasa dalali, wakili mzoefu, menta na fundi ujenzi.
✓ Uwe na muda wa kutosha wa kuisimamia timu yako. Ni vigumu kununua na kuuza nyumba kwa muda wa ziada kama ilivyo kwenye nyumba za kupangisha.
✓ Dalali wako awe na mtandao mkubwa na awe mchapakazi haswa. Hii itapelekea kuwafikia wanunuzi wengi ndani ya muda mfupi.
✓ Uwe na tayari kukabiliana na hatari za kununua na kuuza nyumba. Mbinu hii ni hatarishi zaidi ukilinganisha na kupangisha nyumba.
Hivyo unaweza kupoteza muda na fedha zako ndani ya miezi michache kwa kuwekeza kwa njia hii.
✓ Uwe na maarifa sahihi ya kuchagua nyumba zinazoweza kuuzwa kwa haraka zaidi.
Hakikisha unanunua na kuuza nyumba ndani ya ratiba iliyopangwa na timu yako ya uwekezaji.
Hakikisha unatafuta vyanzo vizuri vya mitaji fedha ili kuepuka gharama zisizo za lazima.
Swali ninalotaka kukupa majibu yake kwenye ukurasa huu ni hili:
✓ Je itachukua muda gani kupata mnunuzi wa nyumba na kukamilisha malipo?.
Mambo Ya Kuzingatia Wakati Kukadiria Muda Na Jumla Ya Gharama Za Ukarabati
MOJA.
Fahamu jumla ya wiki atakazotumia fundi kukamilisha ukarabati.
Baada ya kufahamu idadi ya wiki ambazo atatumia fundi ujenzi kukamilisha ukarabati wa nyumba, chukua idadi ya wiki hizo zidisha mara mbili (2).
Fundi ujenzi ambaye ni mzoefu na ana vibarua wengi atafanya kazi ya ukarabati ikamilike mapema.
MBILI.
Fahamu Jumla Ya Gharama Za Ukarabati.
Baada ya kufahamu gharama hizo, chukua kiasi hicho zidisha mara mbili (2). Ni vigumu sana kudhibiti bajeti za fedha na matumizi ya muda.
Makadirio ya gharama za ukarabati yanatakiwa kuandikwa mapema kabisa kwenye ripoti ya ukaguzi wa nyumba.
Ripoti hii inatakiwa kuandikwa kabla ya kufanya maamuzi ya kununua nyumba hiyo unayokarabati kwa lengo la kuuza ndani ya miaka miwili (2).
TATU.
Ainisha Kazi Unazoweza Kufanya Wewe Mwenyewe.
Mtaji wa nguvu (Sweat Equity) ni kuongeza thamani ya nyumba kwa kutumia nguvu na muda wa mmiliki wa nyumba husika.
Utaweza kuongeza kiasi kikubwa cha faida endapo kuna kazi utakuwa unafanya wewe mwenyewe.
NNE.
Miezi Miwili (2) Ya Kutangaza Nyumba Yako.
Kwenye hali ya kawaida ya soko mahalia, miezi miwili (2) ni muda wa mzuri wa kutangaza kuuza nyumba yako.
Unatakiwa kuongeza mwezi mmoja kwa ajili ya kukamilisha mauzo ya nyumba. Kwenye hali nzuri ya soko la ardhi na nyumba unaweza kupata wanunuzi ndani ya wiki ya kwanza ya kutangaza.
TANO.
Anza Kutangaza Nyumba Mapema.
Usianze kutangaza nyumba baada ya kukamilisha ukarabati wa nyumba. Anza kutangaza kuuza nyumba wiki chache kabla ya kukamilisha ukarabati wa nyumba.
SITA.
Kuwa Na Dalali Wa Kutangaza Nyumba Yako.
Dalali awe na uwezo wa kuwafikia wateja wengi zaidi. Dalali awe anatumia njia tofauti tofauti za kutangaza nyumba yako.
Watumie wawekezaji wengine kwenye ardhi na majengo kupata wanunuzi wa nyumba unayouza.
SABA.
Linganisha Muda, Gharama Za Kununua (ukarabati na bei ya kununulia) Na Chanzo Cha Mtaji.
Unatakiwa kutumia muda mchache kukamilisha ukarabati wa nyumba ndani ya muda sahihi.
Unatakiwa kukamilisha ukarabati ndani ya kipindi ambacho itakuwa rahisi kufanya marejesho ya mkopo kwa wakati endapo ulinunua nyumba kwa kutumia mkopo.
Pia, unatakiwa kutumia jumla ya gharama zinazotakiwa kukamilisha ukarabati na sio zaidi ya hapo.
Ni muhimu kuweka vipaumbele kwenye ukarabati wa nyumba unaongeza thamani ya nyumba yako ya kuuza ndani ya miaka miwili (2).
Ukitumia gharama kubwa kufanya ukarabati unajiweka kwenye mazingira ya kupata hasara au kupata kiasi kidogo sana cha faida.
Ukitumia muda mrefu kufanya ukarabati na kutafuta wanunuzi utajichelewesha kutengeneza faida.
Kununua na kuuza nyumba hulipa zaidi kwenye hali nzuri ya soko la ardhi na majengo.
Kwa kawaida unatakiwa kutengeneza zaidi ya asilimia 20 ya jumla ya gharama za zote ulizotumia kwenye nyumba husika.
Muda mzuri unaopendekezwa wa kukamilisha shughuli zote za ukarabati na mauzo ni miezi sita (6) kutegemeana na aina ya jengo lenyewe linalofanyiwa ukarabati.
Majengo yanayofaa zaidi kwa ajili ya kununua na kuuza ndani ya miaka miwili (2) ya madaraja yafuatayo;-
✓ Majengo ya daraja B.
✓ Majengo ya daraja C.
Majengo ya daraja B ni kundi la majengo yaliyojengwa kati ya miaka kumi (10) hadi miaka ishirini (20) iliyopita.
Majengo ya daraja C ni kundi la majengo yaliyojengwa kati ya miaka ishirini (20) hadi miaka thelathini (30) iliyopita.
Majengo ya daraja A hayafai kununua na kuuza ndani ya miaka miwili kwa sababu yanakuwa hayana kasoro nyingi zinaweza kufanyiwa ukarabati na kuongeza thamani yake.
Majengo ya daraja D hayafai kununua na kuuza ndani ya miaka miwili kwa sababu yanahitaji kiasi kikubwa cha fedha za ukarabati.
Hii inaweza kupelekea kushindwa kufanya makadirio sahihi ya jumla ya gharama za ukarabati. Hatimaye kushindwa kufanya makadirio ya jumla ya faida utakayopata baada ya kuuza.
Majengo ya madaraja A na D yanaweza kufaa kununua kutoka kwa wauzaji waliohamasika ili ununue kwa punguzo kubwa la bei.
Rafiki yako,
Aliko Musa.
WhatsApp; +255 752 413 711
Bofya Hapa Kujiunga Na Kundi La WhatsApp La ARDHI NA NYUMBA CLUB
https://chat.whatsapp.com/FeMEt5K2mYbKNYoPR8tRdX
Bofya Hapa Kujiunga Na Kundi La Telegram La ARDHI NA NYUMBA CLUB
https://t.me/joinchat/Ydwj2U9-NKtmMGY0
Bofya hapa, kisha andika barua pepe (email) yako ili uendelee kupata masomo mazuri ya ardhi na majengo.